रायगड प्रतिबिंब न्युज चॅनलच्या बातमीची माणगांव नगरपंचायत प्रशासनाकडून दखल 

प्रतिनिधी –  अरुण पवार  ( माणगाव )  रायगड प्रतिबिंब न्युज चॅनलने माणगाव मुख्य स्मशानभूमीच्या दुरावस्थेची बातमी नुकतीच प्रसिद्ध केली होती. या बातमीची दखल घेत नवनिर्वाचित नगराध्यक्षा शर्मिला सुर्व यांनी तातडीने नगरसेवकांची बैठक बोलावली होती.  या बैठकीनंतर नगराध्यक्षा शर्मिला सुर्वे, उपनगराध्यक्षा हर्षदा सोंडकर, मुख्य कार्यकारी अधिकारी संतोष माळी समवेत नगरसेवक  सचिन बोंबले, कपिल गायकवाड, दिनेश रातवडकर, अजित तार्लेकर यांनी प्रत्यक्ष स्मशानभुमीच्या झालेल्या दुरावस्थेची पाहणी करीत साफसफाई करण्याचे आदेश दिले आहेत.

स्मशानभुमीच्या प्रत्यक्ष पाहणी दरम्यान, नगराध्यक्षा शर्मिला सुर्वे यांनी प्रथम पाणी पुरवठा सुरळीत राहण्यासाठी पाण्याची टाकी बसविण्यात येऊन नळ जोडणी तातडीने करण्याची कार्यवाही करण्यात यावी, वाढलेले गवत काढून टाकण्यात यावे, बंद अवस्थेत असलेली विद्युत दाहिनी, नवीन वीज जोडणी करून दिवे तातडीने सुरू करण्यात यावे तसेच स्वच्छतागृहांची देखील साफसफाई करण्याचे आदेश दिले सोबतच या स्मशानभुमीच्या सुशोभीकरणासाठी  ४० लाख रुपयांचा निधी उपलब्ध झाला आहे. या निधीतून संरक्षक भिंत, सरण चौथरे, भराव, रंगकाम आणि नागरीकांना बसण्याची आसन व्यवस्था होईल तसेच सुंदर अशी बाग तयार करण्यात येईल तसेच साफसाफाईसाठी एका कामगाराची देखील नेमणूक करण्यात येईल असे आश्वासन नगराध्यक्षा शर्मिला सुर्वे यांनी दिले. याप्रसंगी ४ तास पाणी पुरवठा होण्यासाठी  हातपंपासह बोअरवेल बसविण्यात येणार असल्याची माहिती देखील त्यांनी दिली. या बोअरवेलचे काम साई बोअरवेलचे मालक अरुण क्षिरसागर हे मोफत  करुन देणार आहेत.  यावेळी नगराध्यक्षा शर्मिला सुर्वे, उपनगराध्यक्षा हर्षदा सोंडकर, नगरसेवक सचिन बोंबले, कपिल गायकवाड, दिनेश रातवडकर, अजित तार्लेकर कार्यकारी अधिकारी संतोष माळी आदी मान्यवर उपस्थित होते.