मध्यस्ती करण्यासाठी गेलेल्या तरुणावर मद्यधुंद पुणेकरांचा हल्ला ; दगडाने मारत केले रक्तबंबाळ

प्रतिनिधी  – संतोष उध्दरकर ( म्हसळा ) रायगड जिल्ह्यात मद्यधुंद पर्यटकांची दादागिरी कमी होण्याचे नाव घेत नाही आहे. हरिहरेश्वर येथील घटना ताजी असताना सोमवारी रात्री भांडण सोडवण्यासाठी गेलेल्या तरुणावर मद्यधुंद पर्यटकांनी धार धार दगडाने हल्ला करून गंभीर जखमी केल्याचे घटना  म्हसळा तालुक्यातील घोणसे घाटात घडली आहे.

माणगाव येथून म्हसळा येथे  रात्री ९ च्या सुमारास जात असताना  जखमी सलीम घंसार वय ४० वर्षे याला म्हसळा तालुक्याती  घोणसे घाटात दोन वाहनातील काही लोक ओव्हरटेक मारण्यावरून भांडण करत असल्याचे निदर्शनास आले. यावेळी  शांत स्वभावाचा सलीम हे भांडण सोडवण्यासाठी गेला असता डस्टर या गाडीतील ५ मद्यधुंद पुणेकर पर्यटकांनी सलीम याला रस्त्यावर पाडून धार धार दगडाने त्याच्या चेहऱ्यावर मारण्यास सुरवात केली. या हल्ल्यात सलीम हा रक्तबंबाळ होऊन गंभीर जखमी झाल्याचे पाहून पर्यटकांनी तेथून माणगाव च्या दिशेने पळ काढला. मात्र माणगाव पोलिसांनी या ५ आरोपीना अटक केली. सलीम यांच्या चेहऱ्यावर गंभीर दुखापत झाल्याने त्याला म्हसळा येथून एम. जि. एम.रुग्णालयात हलवण्यात आले आहे. पकडण्यात आलेल्या आरोपीवर म्हसळा पोलीस ठाण्यात गुन्हा दाखल करण्यात आला आहे.